Þátttakan í fimleikafjörinu okkar fór fram úr björtustu vonum. Flestir íslensku þjálfararnir okkar eru í feiknaformi eftir stíft þjálfaranámskeið núna um helgina og Vivi og Cezar í miklu stuði í salnum. Þetta getur bara orðið mikið gaman.

Við biðjumst velvirðingar á því að vera ekki búnar að svara fyrr og eins því að við þurfum að seinka byrjun námskeiðsins til fimmtudagsins 17.01.2008. Þetta er í fyrsta sinn sem við höldum svona námskeið hérna í Keflavík en vonandi ekki það síðasta. Það er okkar von að skemmtilegi fimleikasalurinn okkar opnist með þessu móti fyrir fleirum í samfélaginu og góður félagsskapur myndist. Fimleikar eru nefnilega feiknafjör og afar góð líkamsrækt.

Við getum því miður aðeins tekið inn 20 konur á þriðjudögum en allir sem skráðu sig komast í tímann á fimmtudögum. Við munum skipta niður á nokkarar vinnustöðvar í hverjum tíma þannig að allir hafa val um verkefni eftir getu og formi.

Vegna góðrar þátttöku höfum við ákveðið að lækka gjaldið niður í 7.500 krónur fyrir tímann sem er einu sinni í viku (Samtals 12 klukkustundir) og 11.000 krónur fyrir 2 skipti á viku (samtals 3,5*6= 21 tími ). Greiða þarf æfingagjaldið í lok tímans á fimmtudaginn.

Okkur vantar kennitölur, póstföng og GSM síma fyrir nokkrar konur, viðkomandi mega gjarnan senda okkur línu. Felix er tölvuforrit sem heldur utan um alla iðkendur félagsins (Forrit frá FSÍ/ÍSI) og það vinnur á kennitölum.

Hlökkum til að sjá ykkur allar

Viveca, Cezar, Mæja Óla, Elín Íslaug, Hildur María og fleiri frábærir þjálfarar fimleikadeild Keflavíkur.